الأرشيف التاريخي لأم الفحم
اسمي عبد الرحمن داود إبراهيم أحمد سلامة مرعي كبها ومعروف أكثر بكنية ” أبو صدام ” .
سنة الولادة : 1953
شو درست؟
درست علوم سياسية في كلية عيمق يزراعيل، وعندي دراسة شخصيّة دينيّة ومعي رخصة مرافع شرعي .
طيب احكي لنا شوي من فضلك عن العيلة، عن عيلتكم ، الأول خلينا نبدأ من الوالد والعيلة والأخوة والأخوات لحد بعدين نسأل عن الأشياء الثانية.
إحنا بالأصل من برطعة، جدي أبو أمي المرحوم محمد أحمد سلامة أبو جبر حضر للمنطقة هاي (أم القطف ) سنة 1905 في بداية القرن يعني، وأقام في المنطقة الشمالية اللي اسمها ” الطويلة ” ، إحنا جينا متأخرين شوي ، جينا سنة 1943 ، أبوي يعني لحاله ، أعمامي كلهم ببرطعة ، في إلنا أراضي يعني كانت سابقى موجودة أرض بملكيتنا هون واستقرينا فيها . أحداث الـ48 عصفت بالمنطقة كلها وكثير من الناس هجّروا ، ولكن الفضل يعود لأمي اللي أبقتنا هون وتشبثت بالمحل ، حتى غاب أبوي أشهر ، خلال العمليات الحربية وأجا بآخر لحظة لو تأخر يومين ثلاث بحصوهوش [1] هون يعني.
يعني وين كان أبوك؟
أبوي كان عند أهله في برطعة. وأمي أصرّت على البقاء في الأرض ، وبقيت والحمد لله رب العالمين إحنا مدينين إلها أساساً بالبقاء . طبعاً في البداية شهدت العائلة الانتقال من جو لجو ومن حكم لحكم وكان صعب ، أبوي مقدرش يتأقلم يعني بالشغل عامل، فاقتنى قطيعاً من البقر والحقيقة انه كنا نعيش بكرامة من زراعة الأرض الفلاحة ومن رعي المواشي. وكان طبعاً الحكم العسكري وتقييداته.
انتوا اكم أخ وأخت ؟
إحنا 10 أخوة
يعني قديش بنات وقديش أولاد؟
5 و 5 عدالة في التوزيع
وجدّك أبو أبوك؟
جدّي أبو أبي في برطعة هو عاش ومات في برطعة مجاش [2] على أم القطف .
وجدك شو كان يشتغل؟
جدي كان من وجهاء عائلة الكبها وكان عنده ديوان ، بحل مشاكل وبيأمر بالمعروف وبنهى عن المنكر،جدي حقيقة كان من الوجوه المحترمة في برطعة يعني كان يعتبر واحداً من الختيارية اللي كان الهم ثقلهم . ولذلك أبوي وأعمامي تربوا في هذا البيت ونقلت هذه بالوراثة إلنا . أنا جدي أبو أبوي بعرفوش ، بس عشت مع جدي أبو أمي نحو ثلاثين سنة ، وكان الله يرحمه نسابة وشاعراً ، يعني أنا أكتب الشعر ولكن شعر بالفصحى هو كان يكتب بالعامية حتى إنه لما جرت انتخابات في كفر قرع وصفها بشكل دقيق ، يعني هو محضرهاش بس قالوا له فألف قصيدة حلوة .
كتب شي عن ثورة الـ1936؟
آه طبعاً عن ثورة الـ1936 الثورة وعن انهزام الانجليز ومعركة الظهرات المشهورة .
طيب شو كتب عنها؟
– انا حافظ مقتطفات بقول فيها :
“أهالي برطعة يوم الخميس لبوا الندا جاءوا صادقينا
هاجمونا بطيارات وساقونا للظهرات [3]
بأي مبدأ ، بأي دين ضربونا بقيازين[4]
تا يسمع حميد الدين [5] وباقي الزعماء الأحرار
ضربونا بمترليوز[6] ومن الله أتانا الفوز
وأيدنا قول الدروز[7] ولاقيناهم عالدوار[8]
سجّل عندك يا تاريخ الانجليز ولوّا فليخ [9] من باب واد السمنطار[10]”.
هو شارك؟
هو لم يشارك ولكن كان مضيفاً للثوار ، يعني داره بتعرف أبو درة، بتعرف عبد الله الأسعد، وبتعرف عبد الرحيم الحاج محمد . قادة الثورة الكبار كلهم كانوا يأتون لبيته ويضيّفهم تمام كان داعم للثورة أما هو كرجل لم يشارك .
ولا مرة حصل انه الانجليز حاصروا البيت أو حاصروا البلد؟ أو تم التحقيق معه؟
هذه مداهمات معروفة ، بس منطقتنا لنقل أولاً صعوبة الحركة فيها وبعدها عن المركز والنشاطات الحقيقية … الانجليز كانوا يمروا مرور يعني ، وطبعاً المداهمات تأتي عن طريق إخباريات ، يعني بيجي مخبر بقول إنّه دار فلان في ثوار بيجوا عليها ، ما حدا أخبر بجوش والانجليز كانوا عنيفين ، يعني أول من سن سنة هدم البيوت هم ، والعقابات الجماعية هاي.
[1]. المقصود لا يعد ضمن الإحصاء الذي قامت به السلطات الإسرائيلية بعد تسلمها منطقة المثلث
[2] . بمعنى لم يأتِ
[3] . الظهرات : هي اسم لمنطقة تقع شمال غربي برطعة وهي غير الحي الذي يعرف بنفس الاسم في عرعرة .
[4] . القيازين : جمع “قيزان” وهي القذيفة الضخمة الحارقة التي كانت تقذف من الطائرات لتثير الفزع والدمار .
[5] . الإمام يحيى حميد الدين حاكم اليمن في تلك السنوات .
[6] . مترليوز : مدفع رشاش كان يستعمله البريطانيون لقمع الثورة والثوار في ثورة 1936 -1939 .
[7] . المقصود هنا ضباط دروز من سورية شاركوا في فصيل المتطوعين العرب الذين جاؤوا مع فوزي القاوقجي وقد أداروا هذه المعركة الموصوفة في المقطوعة .
[8] . المقصود دوّار برطعة .
[9]. المقصود ولّوا هاربين .
[10] . وادي يجري من غربي برطعة باتجاه الغرب ليصب في وادي عارة قرب خربة عارة ومنطقة الأساور .
الحالة الاجتماعية ؟
متزوج ولي 16 ولد الحمد لله من كبار وصغار .
بلشت عملك بالزراعة ؟ شو الزراعة اللي اشتغلتو فيها ؟
هذاك على زمن الانتداب . شعير،قمح،سمسم ، خضروات باذنجان. كنا نزرع في أرض اللجون .
كيف الناس كانوا عايشين على زمن طفولتك ، كيف كانت العلاقات الاجتماعية؟
ممتازة ، يا ريت في معاملات ومجاملات اليوم1% من اللي بقى.
تقسيم الأراضي والعائلات والحارات ؟
كانت الاغبارية الشمالية والجبارين شرقي والمحاميد جنوب غربي والمحاجنة قبلي [1].
فروع المحاميد شو هي ؟
كيوان ، خضر ، مسعد، حامد.
أنت أول ما وعيت شو صاحي من ثورة ال1936 ؟
أجو الانجليز احتلوا المدرسة ، بقاش غيرها مدرسة المحاميد ام الفحم ، بقوا يجوا يحتلوا ، يقعدوا أشهر . وكل إشي في البلد كان ثاير ، بقت ثورة.
بتذكر أحداث خاصة؟
أجوا طوقوا المدرسة والمقبرة ، قتلوا منهم أكّثر من 20 واحد إنجليز.
صاحي أسامي من الثوار؟
يوسف الحمدان ، بقى أحمد الفارس.
بقى إلك علاقة معهم ؟
لا ، بقيت ولد بحدود عشر سنين أو أقل.
أبوك إله علاقة معهم ؟
آه ، أنا بذكّر لأبوي ، كنا بعين خالد ، بذكّر شو العلاقة مع أبوي ، ما طلع مع الثورة بس بقى يضيف ، في مرة شفت تين وفي عليق استشلبت [2] التين ، هسّة بدي أطلع عالتينة ، هسّة في مسرب بقلب العليق . ورحت وشفت عصي . صرت أصيح وقلت يابا قديش في عصي ، قلل لي أسكت . بذكّر أخرى مشكلة تصاوب مصطفى الأسمر ، بقوا ساكنين بالخضور ، بقى قائد فصيل من الجبارين ، جابوا لعند أبوي حطوه ، بقوا يسموه مِزْبَل ومِتْبَن ، هسّة تروح حياة أمي .
[1] . المقصود الجنوبي .
[2] . المقصود طاب لي منظره .
الاسم الرباعي ؟ :
أحمد حسين صافي بويرات
أي سنه ولدت؟
سنة 1936
وين ولدت؟
بالبيار
قديش عدد الأخوة والأخوات اللي لإلك؟
5 أخوة و4 خوات .
قديش عدد الأحفاد عندك؟
أولاد ابني، الله يخلي أولادكم 6، ثلاث بنات وثلاث أولاد
طيب حياة والدك بإيش اشتغل؟
ولا عمره اشتغل أحنا مضينا الحياة بقينا ببيوت شعر، وكان عنّا طرش [1]، كان عند أبوي طرش.
لما ولدت بقت بيوت الشعر[2] بعدها موجودة؟
شو بعدها موجودة ؟ بال1972 راح بيت الشعر من عنّا إحنا من عند أبوي يعني
هو آخر بيت شعر لل 72 ظلوا؟
حتى بقينا بانيين دور يعني مثلا حياة عمي أسعد لبويرات بنى دور يمكن بالأربعينات 1940 بنى دور ومقعدش فيهن، مقعدش فيهن مرضيش يقعد فيهن.
بيت الشعر كيف بكى ينبني بيت الشعر من إيش؟
في اثنين أخوة من أم الفحم ، محمد الشعّار وأخوه يوسف ، هذول همي بقوا يشكّوا الشعر [3] يجيبوا شعر المعزة ، ويخذوا عندهم ويشدوه من على المنساجة ، يشدوا تقول مثل هينا وعشر أمتار أو 12 متر ، يمدوهن ويجيبوا برميل وخيطان ومنساج يقولوا منساج ويعملوا شقاق [4]، يعني الشقة عرضها تقول متر عرض متر الشقة والطول تقول 12 متر على هوا البيت، وهذا لا يمكن يندب [5] بالشتوية .
شو مع عمدان الخشب ؟
ثلاث عمدان وعمود بالنص، وفي بيوت اللي إلهن أربع عمدان يعني مش كل لبيوت واحد فاهم مش كل لبيوت واحد، بيوت شعر كانت ست شقاق .
وأنتو تحطوا العمدان؟
إحنا على وجهه الشتوية نفرط البيت ، نفرطه بست أشقاق ، ست أشقاق من هذا النوع نفرطه ونجيب شقه جديدة ونحطها بالنص وبجين النسوان يخيطن بيت الشعر ونعمل حفلة ونطبخ ونغدي النسوان على أنهن خيطن بيت الشعر ، ونقعد على بيت الشعر من هون ومن هون وبجرونا فيه ميشان يجبد [6] ، ميشان يجبد ، ونعمل له رواق ، يعني بردوا من شقاق من هون ومن هون من خوف الريح ونجيب قصّيب ، بجين النسوان وبسوين القصيب على داير من دار .
طيب لما بكت تشتي الدنيا؟ بقتش تفوت المي؟
يعني لو تشتي الدنيا منعمل له قناة ، منعمل لبيت الشعر قناة ميشان متفوتش المي لجوه . بقتش تفوت المي أبدا، ولا أحلى منه ولا أجمل منه ، حتى لما تشتي الدنيا ولا نقطة تنزل منه .
بقلب بيت الشعر بقيتوا تعملوا غرف تقسموا؟
أحمد: آه طبعا، غرفتين في بغرفتين في بثلاث، في بأربعة للمشايخ لكبار، مشايخ القبيلة بكين أربع عمدان يعني مثلا تبع شو أسنها تبع الأردن بشير الحسن هذا بقى البيت تبعوا ست عمدان، ست عمدان بقى بيتوا هذا شيخ القبيل تبعهم شيخ القبيلة تبع الغوادرة بالأردن .
[1] . المقصود مواشي من أبقار وضأن وأغنام وماعز .
[2] . مساكن مؤقته يستعملها البدو الرحّل وهي مصنوعة غالباً من شعر الماعز .
[3] . بمعنى يجمعوه .
[4] . مفردها شق وهي الحد الفاصل بين المساحات متعددة الأغراض ( للسكنى والضيافة ) داخل بيت الشعر .
[5] . بمعنى يقع .
[6] . المقصود شده بقوة كي لا يبقى فيه تجاعيد .
وين كنت تقطن في الماضي؟ البيت القديم؟ وكيف كانت البيوت في حينه؟
أولاً كانت في هالسنوات اللي اٍحنا ولدنا فيها ،كانت طريقة الحياة بسيطة وبدائية بدّي أقلك ، كان في هناك بيوت من حجر وطين ، بيوت وسيعة مع خوابي مشان نخزن القمح والحبوب، فاٍحنا كنّا ساكنين في بيت كبير يعني يمكن 10 ب 8 عالقناطر بعرفش اٍذا بتعرف فكرة
وصدقني هاي أثبتت اٍنها أقوى من الباطون والأشياء الحديثة هاي ،زي ما هي ببنوها بطريقة مثبتة فالبيت هاذ كان في اٍلنا بيت ثاني .
وين موجود .. بنفس المحل هون؟
لع، اٍحنا كنّا ساكنين هسّة وين مجمع أبو عبيدة هناك بيتنا اللي كان سابق لأنه كان في جامع للاٍغبارية جامع أبو مية ، مية وعشرين متر فصار طموحات عندهم اٍنهم يبنوا مجمّع فكانت.. اٍتوجهوا اٍلنا اٍذا بنغدر نتبرع بالمكان ، وقلنا لهم هاي نعتبرها جداً فرصة وإٍحنا نقدم هذا الاٍشي بطيبة خاطر.
أي سنة وهبتوا أرضكم للمجمّع أبو عبيدة؟
.بيجوز من 15 سنة أو أكثر هاي ، أنا جيت بنيت هون في ال1959 .
حدّثنا عن ثقافتك وين تعلّمت ؟ شهاداتك؟ حدّثنا عن التعليم بفترتك اٍسم المدرسة، المدير،معلمين ،معلمات ،هل كان معلمين من خارج أم الفحم أم كلهم من نفس المنطقة؟
الصحيح، أنا تعلّمت لحد الصف الخامس لأنه كانت هاي القمة بالمنطقة ،وكان اللي عنده اٍمكانية وبدّه يتقدم لازم يسجل في مدرسة جنين، لأنه جنين كانت تعتبر مركز القضاء أو عاصمة القضاء لأم الفحم وكل القرى هاي، ولأسباب بعرفش هسّة إذا في مناسب اٍني أذكرها ، لأسباب معينة أجاني رفض قبل الاٍفتتاح للثانوية بأسبوع وهذا كان اٍله سبب نتيجة فساد بين المعلمين. ولذالك أتوقفت لهون ومكنش عندي إمكانية ثانية . وأنا بعد ما اٍنه وصلت سنة 1942 تقريباً انتقلت لحيفا ،في حيفا هناك كان في إلي هناك أقارب اللي فاتحين محلاّت تجارية اشتركت معاهم وبدأت بالعمل التجاري.
بتذكر مين كان مدير المدرسة عندكم أو أسامي معلمين؟
طبعاً بذكر ،اللي كان عنا في آخر واحد اللي هو أنا عاصرته طاهر حسين من قرية صانور في منطقة جنين.
معلمين مثلاً؟
معلمين في هذاك الوقت بعتقد ممكن كان واحد أو اٍثنين اللي سنحت لهم الظروف اٍنهم يتعلموا،منهم بعتقد حسن العبد الفتاح ،وجيه العبد الفتاح.
بدنا تنتقل لتجربتك بالعمل ..تجربتك بالعمل،معروف عنك اٍنك كنت عضو نائب بأول مجلس محلّي معين بأم الفحم ، من كان أعضاء هذا المجلس برئاسة أحمد أبو حشيش؟وهل كانت العضوية بالمجلس حزبية- عائلية وشو كانت اٍنجازاتكم يعني بهديك الفترة؟
بعدها اٍذا في مجال تحكي لنا عن فكرة الاٍنتخابات – متى بدأت الاٍنتخابات؟ ومن كان أعضاء أو رئيس أول مجلس محلّي منتخب؟هل ما زلت تشارك بالصلحة كمندوب عن عائلتك وهل شاركت بصلحة تاريخية؟ هاي بشكل مجمل الأسئلة اللي بدنا نتطرق لها ؟
أنا أولاً، كل هاي الأمور عندي موثقة وباٍمكانكم تصوروها يعني أول مجلس محلي كان تعيين ،على أساعلى أساس عائلي ..مين اللي عينه؟
وزارة الداخلية يعني الحاكم لوا اللي كان عادةً كنّا تابعين لحيفا.
متذكر مين كان الحاكم بهذيك الفترة اللي عينكم؟
القائم مقام كان اسمه سوميخ عراقي،أما شخص مؤدب والمزبوط حاكم لوا ،لأنه عادة بقى القائم مقام هو اللي يعين .
هو باٍتصال مباشر؟
هو اللي اٍله الاٍتصال المباشر ، هاي بتذكرني بحادثة بطرفة زي ما بيقولوها ،أجا مرة قائم مقام جنين زار قرية مصمص ،قائم مقام اٍشي كبير للناس مظلّش حدا بالقرية بدهم يتفرجوا على القائم مقام هذا شو هو.وهم ماشيين وراه أتجمعوا أولاد…أتجمعوا أولاد كثار ،في واحد ببساطة قال ” ينعل أبوكم هو سعدان لاحقينه؟! “
يا ريت تعطينا فكره عن سنة ولادتك وين ولدت ، والبيئة إللي ولدت ونشأت فيها :
أنا مواليد 1933 .12 .9 ، ولدت في بيئة قروية ، لأبوين يتمتعوا في كل صفات القروية في ذلك الوقت ، أب كان لحد ما ، يعتمد على التجارة في حياته وفي مدخوله ، وأنا مولود من أسرة مكونة من 7 أنفار، إحنا أربعة إخوة وثلاث خيّات ، أنا بكون الرابع بالترتيب بين الأخوة . أنا اذكر تلك الأيام الصعبة إللي عاشوها الناس كيف كانت علاقات أهل البلد ، وأهل القرية ، الكل يعتمد على الكل ، والكل بحاجه للكل ، في هاي البيئة وفي هاي الحالة أنا نشأت ، إحنا الأربعة الأخوة تلقينا تعليم في مدارس أم الفحم الابتدائية : أخوي أبو البديع مواليد 1920 تعلم 3 سنوات في المدارس ، أخوي أبو العفو مواليد 1925 برضه تعلم في أم الفحم في ابتدائية أم الفحم وأنا كذلك وأنا ظليّت في المدرسة لسنة 1948 لحد ما سكرت المدرسة .
الفترة العثمانية ما عشتها ولا بتعرف عنها أشي بشكل مباشر ؟ :
لع كعيشة فيها ، لكن أنا بعرف شو كان مستوى حياة الفلاحين في هذيك الأيام ، حياة الناس يعني كانت البساطة المتناهية ، إنه الكل بحاجه للكل ، إذا رب الأسرة أمّن القمح والزيت مصروفه للسنة كلها فهاد سعيد لأنه أساس التغذية القمح والزيت ، من استطاع تخزين هاي المؤونة ، استطاع إنه يضمن عائلته لسنة مع مؤن تبعها ، وما تبقى كله إضافات ، أو مثل ما كانوا يقولوا : ” سنة بلا بصل مرقت بلا طبيخ ” . كانت الدجاجة في حياة الناس هي جزء من اقتصاد الدار ، كانت ربة البيت تقنى عشر دجاجات أو 15 دجاجة حتى 20 دجاجة ، حسب استطاعتها ، وفي التبادل التجاري تودّي البيضة على الدكان ، تجيب إبر، تجيب خيط إبرة ، تجيب سكر ، تجيب طحين ، تجيب مستلزماتها ، تعطيه بيضة تأخذ إللي بدها إياه ، فلذلك كانت الدجاجة إلها موقع اقتصادي جيد في الدار . يعني يبقى في دار فلان – بده يأخذ الطحنة على المطحنة وما عنده حبل ، في عند دار فلان حبل يروحوا يأخذوا الحبل من عند دار فلان ، لأنه مش كل بيت فيه حبل . هسّة كل الناس في حياتهم كان في ترابط ، بيجي عرس يقولوا أصحاب الغنم، يلموا أصحاب الغنم الحليب منشان يطبخوا للعرس ، وعشرات النساء يرحن يلمين حطب منشان يولعوا نار ويسهروا على النار ويطبخوا . كذا كانوا الناس مترابطين الناس في بعضهم البعض كل الناس مترابطين وفي تسامح كبير لأنه هيك حياتهم . إحنا لما صار الانتداب البريطاني، وصاروا الناس يروحوا يشتغلوا في حيفا وفي يافا وفي معسكرات الجيش ، وفي ورش الحدادة تبع القطار البريطاني الفلسطيني ، توزعت الأمور ، وصاروا الناس يطلعوا من أم الفحم على حيفا وعلى المدن ، ويشتغلوا وتقول بدأ نمط الحياة يختلف تدريجيا بدأ يختلف شوي شوي ، وهكذا .
من فترة الانجليز شو بتذكر ؟ :
في فترة الانجليز أول أشي مثل ما قتلك أنا بقيت بعدني ولد صغير الحوادث بشكل عام لا أذكرها لكن أذكر في سنوات ال – 30 كيف الشباب راحوا يشتغلوا على حيفا وكيف راحوا يشتغلوا على يافا ، وكيف بدأوا يتركوا الأرض ويروحوا .
تذكر شراء أراضي مثلا من قبل اليهود؟ :
آه ، أذكر شغله يعني كنت أسمعها لكن ما كنت أعرف تفاصيلها ، في السبعينات كنا نروح نحش حشيش من برة يعني ما نعتمد على الحشيش إلي إحنا زارعينه ، مرة أنا حد نهر المقطع بحش أنا وصاحبي، قام أجا علينا واحد يهودي حامل الفرد دار نقاش بيني وبينه ، بقول له أنت تطردنا من أرضنا قال لي كيف بطردك من أرضك ، قال لي هاي أرضنا أنت من وين ؟ ، قلت له أنت من وين ؟ مش أنا ، أنا طلع نبات من هاي الأرض وأنت من وين جئت من رومانيا ، من جنوب إفريقيا من وين جئت ، قال لي أنت من وين من أي بلد ؟ قلت له أنا من أم الفحم وأنت من وين ؟ قال من كفار طابور ، قال لي يا حبيبي هاي مش أرض أم الفحم قلت له وإلا ؟ قال لي هاي أرض رمانة أنا اشتريت هاي الأرض سنه 1934 -400 دونم في ثمن الدونم أربع ليرات وانقلبوا عليّ الفلاحين ، ودفّعوني أخرى مرة أربع ليرات 400 دونم سنة 1934.
وثائق تاريخية
صور
مسنو الوادي
قبل ال 1948
بعد ال 1948
مقاطع فيديو
شهادات شفوية
الحاجة خديجة حسن محاميد معمرة عايشت الفترة الإنكليزية بلغت فوق ال105 سنة. تصوير أرشيف ام الفحم ووادي عارة، صالة العرض للفنون ام الفحم.
مقطع من مقابلة اجراها ارشيف ام الفحم ووادي عارة مع الحاج لطفي العوض محاميد من سكان ام الفحم. الحاج لطفي عوض هو من مؤسسي الحزب الشيوعي في ام الفحم وكان نشاطا سياسيا. عايش الفترة الإنكليزية ومر بتجارب مريرة مع المحتل الانكليزي.
مقابلة شفوية مع الشيخ توفيق عسلية رئيس محكمة الاستئناف الشرعية سابقا ، المقابلة اجريت عام 2017. أجرى المقابلة السيد محمود احمد اغبارية (ابو انس).
مجموعة من المقاطع من المقابلات الشفوية التي اجراها ارشيف ام الفحم ووادي عارة مع مجموعة من كبار السن من منطقة وادي عارة. حيث تحدثوا عن مواضيع عدة، من ضمنها الحياة في فترة الانتداب ، وفي فترة الحكم العسكري ، وتشمل الحياة التعليمية ، والحالة الاقتصادية، والعمل والتراث، والحالة السياسية. المقابلات اجريت عام 2017.
توثيق تاريخي
فيلم تاريخي بالابيض والاسود عن معركة مجيدو في منطقة مرج بن عامر بين القوات البريطانية بقيادة الجنرال إدموند ألنبي والقوات العثمانية عام 1918، وانتهت بانتصار حاسم للبريطانيين.
مقاطع مختارة لرياضة كرة القدم في ام الفحم في سنوات ال 90.
مقطع فيديو من زيارة عُضو الكنيست السابق مائير كاهانا؛ زعيم حركة «كاخ» لأُمّ الفحم عام ال1984 ، والتي على اثرها حدثت مُواجهات عنيفة بين المُتظاهرين والشُرطة الإسرائيليّة . الفيلم من انتاج ارشيف ام الفحم ووادي عارة/ صالة العرض للفنون ام الفحم.
مقطع فيديو لحفل زفاف من سنوات ال50 للسيد عارف رشدي اغبارية، ويظهر في الفيديو العادات والتقاليد القديمة في حفل الزفاف ، كما تظهر البيوت القديمة في ام الفحم بالألوان. الفيلم خاص بارشيف ام الفحم ووادي عارة، صالة العرض للفنون ام الفحم.
تصوير مقاطع فيديو من أجواء سقوط الثلوج في مدينة ام الفحم عام 1992. تصوير ستوديو عنان. مونتاج أرشيف وادي عارة وام الفحم ، صالة العرض للفنون.
مقطع فيديو عن الإعلان عن بلدة ام الفحم كمدينة عام 1984. يظهر في الفيديو مقدم الأخبار المعروف سابقا حاييم يفين يقدم الخبر. كما يظهر في التقرير الإخباري شخصيات فحماوية معروفة من ضمنها اول رئيس بلدية لأم الفحم الأستاذ هاشم محاميد رحمه الله.
الفيلم يعرض مدينة ام الفحم على مر الزمان من الفترة العثمانية حتى يومنا هذا. الفيلم من انتاج أرشيف ام الفحم ووادي عارة، صالة العرض للفنون.
فيديو قصير من الفترة الانتدابية تظهر فيه مجموعة من القرى والبلدات العربية ، الفيديو يعرض الحياة في هذه البلدات والقرى، ويظهر فترة التمرد العربي عام 1936
أفلام وثائقية
مقطع فيديو يعرض قصص نجاح بعض المؤسسات المختلفة في مدينة ام الفحم ومن ضمنها صالة العرض للفنون.
فيلم قصير من تصوير المصور عمار يونس من عرعرة. حيث قام المصور بتصوير مجموعة من النساء المسنات . واسمى الفيلم ” عرائس بالابيض”. عرض الفيلم في معرضه الفني الذي عرض في صالة العرضض والفنون ام الفحم عام 2017
الفنانة العالمية يوكو انو تشارك في افتتاح معرض ” شباك مفتوح” في صالة العرض للفنون ام الفحم, 1999.
